中年好聲音4｜周志康《獨家試唱》豪奪93分首獲MVP 感性坦言：願意去突破就得

《中年好聲音4》昨晚（2日）晚播映「10強累積排名分」第三回合——「突破之夜」。參賽者周志康以一身黑色皮褸及戴墨鏡造型登場，演繹鄭秀文的經典金曲《獨家試唱》，帶動全場氣氛。 

周志康的型格造型獲得著名時裝設計師何國鉦頒發「最佳衣著獎」。主持車婉婉打趣指其眼神猛烈得「好似要吞咗肥媽咁」，肥媽亦形容志康勢如「猛龍」，笑言：「佢一除衫，我隔籬嗰個係咁叫！」評審亦給予高度評價，張佳添盛讚志康兼具實力與顏值，指他「型到爆」：「你絕對可以做到『實偶派』，實力偶像！」更笑言：「結咗婚嘅男人唔可以咁型嚟，你老婆會好冇安全感嚟。」「知音人」李思捷則指被他13秒的 Mic Stand 互動深深擊中：「好似睇緊鋼管舞，揮灑自如」，並笑建議他下次可嘗試雙截棍。 

最終，周志康憑藉破格表現豪取 93 分，強勢奪得本場 MVP。他在獲獎後感性坦言自己原本不是一個喜歡突破的人：「多謝呢個主題，令我可以突破，感謝《中年》呢個舞台。追夢太困難，中間可能會好多個波折，但係唔緊要，你願意去行、去突破、去將自己最想做嘅嘢，一路去做，就得喇。」同時，周志康亦不忘感謝特地到場力撐的太太，公開甜喊：「佢係我屋企嘅 MVP，佢係一個最好嘅太太，最好嘅媽媽。」