夫妻的博弈｜黎燕珊突入大鬧婚禮 做貪錢阿媽爆笑「衰格」 演技獲網民激讚

《夫妻的博弈》昨晚（26日）播出一集，雪文 Sherman（郭柏妍 飾）與繼威 Mark（張頴康 飾）終於拉埋天窗。正當 Sherman 以為可以迎接幸福人生，點知親生阿媽沈淑冰（黎燕珊 飾）竟然無預警踩場，更在婚禮上展露貪錢本色，搞出一場大龍鳳！

劇情講到 Sherman 因為不想面對親生母親，竟然花錢請來特約演員（沈可欣飾）假扮阿媽出席婚禮！豈料真正的淑冰突然踩場，在眾人面前大爆自己才是真生母。Sherman 見到多年不見、曾經狠心拋棄自己的母親，震驚之餘即時下逐客令，趕對方離開。

不過淑冰卻「賴死」唔走，更反客為主斥責女兒為何要找人假扮她。積怨多年的 Sherman 瞬間大爆發，流住淚連環咆哮控訴：「你有咩資格做我阿媽？你記唔記得你要嫁去加拿大，就算見到我都唔會認我做女，你記唔記得呀？」

面對女兒的血淚指控，淑冰竟企圖開脫，聲稱當年因老公有外遇才將情緒發洩在她身上：「就算我幾唔好，都係生你出嚟嗰個！所以我咪搵番你修補關係，你又唔睬我。」Sherman 聽罷更加崩潰激動：「我梗係唔睬你啦！你根本喺度搞破壞，你快啲同我走呀！」

爭吵到最後，淑冰終於露出貪錢真面目！原來她死闖婚禮的唯一目的就是為了錢：「我點都好，都係生你養你嗰個，你今日出嫁，我係咪好應該要有禮金？」她更擺出一副極度「衰格」的嘴臉企圖勒索，最終被保安強行抬走離場，場面極度肉酸。

其實早前在《正義女神》中，黎燕珊已經飾演過貪錢又不理家庭的衰阿媽，今次在《夫妻的博弈》再次完美演繹「衰格母親」，為𢱑禮金連面子都不要。精湛演技令網民睇到咬牙切齒，紛紛留言笑指珊姐已成為TVB「御用衰阿媽」，更有觀眾對 Sherman 的「綠茶」行為表示同情：「其實雪文變成咁嘅性格，佢阿媽真係好大主因！」、「珊姐近年成日做呢啲角色，真係好搞笑又入戲！」