馬貫東陳曉華首合作擦出爆笑火花 讚對方記性好轉數快：個腦好似一部電腦

《死有對証》劇情緊湊，當中飾演熱血衝動警察「高俊」的馬貫東，與患有強迫症的法醫「芷昕」陳曉華（Hera）這對歡喜冤家，互動爆笑十足，深受網民關注！

日前播出一集，高俊隨隊追捕惡霸「暴龍」，二人在後巷展開驚險打鬥後，暴龍竟離奇死於後巷，高俊慘被列為嫌疑人兼勒令停職。為了打探案情，高俊特意請負責解剖的芷昕食飯，打算借機套料。

芷昕更窒爆高俊：「你畀人停咗職，仲當自己係警察呀？」其後高俊提議去後巷重組案情，再遭女方冷笑秒殺，更正氣凜然拒絕對方埋單：「公職人員規定請食飯唔可以超過5百蚊，何況我同你只係啱啱新認識嘅朋友！」令高俊當場口啞啞，場面極度惹笑。

對於網民激讚二人甚有火花，馬貫東接受 tvb.com 獨家訪問時直言，雖然與 Hera 是首次合作，但極速磨合。他更大讚對方記憶力驚人：「佢個腦真係好似一部電腦，記性好到驚人，反應又快！對住我同家雄呢兩個不按理出牌嘅演員，佢完全接得住，令成個感覺更加真實自然。」阿東更笑指劇中經常被 Hera 激到「好嬲」，因為對方角色刀槍不入，令他經常感到「好忟但又好好笑」。

提到劇中大量驚險追逐戲，阿東直認全部都是親身上陣真跑：「呢段時間跑過嘅路，仲多過我過去兩年加埋嘅跑步距離，簡直係一次過補返晒所有 Cardio！」雖然跑到身水身汗，但他大讚團隊氣氛極佳，全靠「氣氛擔當」韋家雄狂放笑彈，就算拍到深宵大家都毫無睡意。