死有對証｜陳曉華吳若希姊妹互動網民爆Like 親揭Jinny私下反差真面貌：令人安心嘅朋友

《死有對証》除了劇情緊湊，當中法醫芷昕（陳曉華飾）與記者佩嘉（吳若希飾）的姊妹情亦成為網民焦點！兩人又Sweet又搞笑的閨密互動，自播出以來大受好評，火花四濺。

日前播出一集，芷昕重遇前男友皓揚（許俊 飾）後翻看舊照，佩嘉見狀即刻怒轟男方係渣男：「佢擺到明係識咗第二個女仔先扮忙唔聽電話！千祈唔好畀我撞到佢，如果唔係一定幫你打鑊甘！」點知當佩嘉得知對方現時已經係頂級律師事務所的律師，竟然一秒「變臉」，極速轉軚勸好姊妹復合，場面極度爆笑。

其後佩嘉臨時出外跑新聞，因為唔熟行情加上著高跟鞋，慘被行家推跌落地。食白果的她唯有向好姊妹芷昕打探案件機密，雖然芷昕深感同情，但依然保持專業態度企硬：「你真係好慘又好努力，但我真係一句都唔可以透露畀你聽。」任憑佩嘉苦苦哀求都無動於衷。

大批觀眾紛紛留言：「好鍾意睇佢哋嘅場口」、「佢兩個嘅互動好Fun」、「閨密就係串吓你又笑吓你咁」。

這對「神仙閨密」在鏡頭前火花十足，Hera 接受 tvb.com 獨家訪問時坦言兩人其實沒有刻意培養感情，一切都是自然流露。她更大爆 Jinny 私下鮮為人知的一面：「我私下同Jinny 接觸時，發現佢原來好成熟！嗰陣我有啲問題問佢，冇諗過佢咁認真答我，答完之後令我有種安心嘅感覺。」Hera 更直言，即使大家私下少聯絡，依然覺得對方是一位「好安心嘅朋友」。

Hera 又大讚 Jinny 是劇組的「能量塔」，即使拍攝時間長、休息少，Jinny 依然能keep住正能量：「令我就算好攰都依然充滿正能量，所以同佢拍嘢真係好開心！」