死有對証｜阮浩棕韓馬利演苦命母子 獲對方點名睇好 戲外大爆與母親專屬默契

《死有對証》昨日（5日）晚播出一集，劇情講述骸骨死者的身分被確認為詹柏宇（阮浩棕飾）的父親，從而揭開一段沉痛過往。原來柏宇自小飽受家暴兼爛賭的父親摧殘，一直與母親馮瑜（韓馬利飾）相依為命；然而命運弄人，馮瑜不幸患上癌症，命在旦夕。

劇中柏宇對患癌母親照顧得無微不至，陪睇醫生之餘，更嚴格管控母親飲食，禁止她食垃圾食物。最搞笑是柏宇竟然親暱地稱呼媽媽為「BB」，搞到 Mary 姐都忍不住吐槽：「你唔好咁長氣，嗌住阿媽好唔好！」雖然嘴上嫌棄，但馮瑜其實十分疼愛兒子，一直珍藏柏宇從小到大的獎狀，母子情深絕對會讓觀眾眼濕濕。

談到今次與前輩韓馬利結母子緣，阮浩棕接受tvb.com獨家訪問時對 Mary 姐讚不絕口：「Mary 姐真係一個好厲害嘅前輩，大家合作感覺好好，成個過程好舒服，真係好鍾意 Mary 姐！」被封為「TVB御用媽媽」的韓馬利，私下更為阮浩棕打了一支極大的強心針，阮浩棕笑言：「Mary 姐私下同我講過：『做親佢仔女都紅㗎！』跟住叫我加油，對我係一個好大嘅鼓勵同鼓舞！」

對於劇中狂嗌 Mary 姐做「BB」，阮浩棕笑指是劇本特意設定來誤導觀眾，但卻無意中拉近了兩人距離：「叫下叫下，感覺同 Mary 姐嘅關係更加親切緊密！」他坦言 Mary 姐的親和力極高，令他經常自然流露真感情：「我扶住佢行嘅時候，會輕輕搓下佢手臂，自己都忍唔住，真係好似我媽媽咁。」

至於現實中會否叫自己母親做「BB」？阮浩棕就直言沒有這個習慣，但卻自爆與真媽媽有一個極度特別的「默契儀式」：「每朝起身我哋一見面，都會有一個好奇怪嘅笑容，又或者臨瞓之前我對佢咁笑，佢都會咁樣回應我，係我同媽媽之間嘅一個專屬小儀式！」