陈炜独家专访｜陈炜入TVB不介意配角做起 自认恋爱脑眼中只有另一半

哪管多次与视后奖项擦身而过，如金子的陈炜，每次演出还是发光。她在《正义女神》的高淑桦，与佘诗曼庭上舌战，戏里戏外都是一场较量，没有谁比下去，只有互相辉映的火花。

陈炜独家专访｜陈炜入TVB不介意配角做起 自认恋爱脑眼中只有另一半：我从来都唔系事业型

陈炜不经不觉入行30年。深明欲速不达，只会按耐静候，继续默默做好本份。她的淡定，是经过年月琢磨。当年「白纸」一张，便与严厉的郑则仕做对手，一度战兢得说不出对白。自知幼嫩，但不退缩，为令前辈收货，以加倍用心弥补不足。陈炜有读写障碍，因此比别人花上更多时间研读剧本，克服每一句字。做人做戏，都是一场千锤百炼的修为。

选美出身的陈炜，由一张「白纸」去到片场，回想新人的阶段，她接受 tvb.com独家专访坦言幸好面皮厚不停请教别人，亦不介意被骂，「当时要企喺咩位置，点样可以唔遮人哋嘅光咩都唔识，真系好靠导演、幕后同事甚至前辈指导点做，我好开心咁多人教我嘢，即使畀人骂都唔紧要。」

年青心口挂着「勇」字，不断向前冲，绝不怕辛苦。她忆述入行第二套作品便一尝吊威也的滋味，更被吊足4小时，「当时喺绍兴一个湖上面，有只船驶出去吊我出船头，模仿人哋水上飘嘅感觉，我吊咗4个钟，就系拍一个喺水上飘好型嘅镜头。」

身为新人的她感到新鲜又好玩，惟她及后发现根本没有这一场戏，最后只剪了几秒放在片头，但她只能默默接受。回想当年经历，陈炜笑言「我唔知系被人玩定点」，「其实系几辛苦，因为当你啲裙摆掂到水会愈嚟愈重，咁样踏步系几辛苦同好考体能嘅事，但𠮶时年青咩都冇问题，同埋拍出嚟系靓嘅。」

在她演戏路上的初期，郑则仕可谓首位令其认识甚么是演戏的人，但作为新人的她要面对重量级前辈加上要担当重戏份的角色，绝对是一大挑战。

「因为本身都未识得入戏，突然间畀我咁重嘅角色，仲要演Kent哥细妹，生活起居嘅戏份要演得好自然，令人觉得好融入个家庭。但当时我好紧张，讲对白都未讲得清楚，加上𠮶时Kent哥要我哋每场戏，将剧本放埋一边，总之佢现场讲啲咩就写低佢，突然间要我硬背一啲嘢系好困难嘅事。」

即使感到无比的压力，自知演技幼嫩的陈炜用心做好本份，尽力演好角色，这份的努力亦被郑则仕看见，「佢最唔钟意啲人冇放个心落去，佢见到我系有用心做有进步，即使做到嘅程度得3、4成都唔紧要，最紧要有心做呢件事。」

遇到严厉的郑则仕令其认识何谓演戏，其后与刘松仁合作驱使她要努力学戏求进，皆因她深知演得好失礼。

「𠮶时同松哥做戏，我记得第一场同佢喺房两个人嘅对白，我真系惊同怯，完全讲唔到嘢，讲到一句讲唔到第二句，不停NG。但松哥好好仲讲笑安慰我，佢问我呢排系咪冇得瞓，所以太热气条脷变大咗，啲对白就会难讲啲，仲叫我慢慢嚟放松啲。」

自觉表现不合格，当刻的陈炜也感到失礼，反思自己的不足，「我唔会因为现场做唔到而喊，但我会𠮶晚返到屋企『啰啰挛』，点解我会做成咁，觉得好失礼，警惕自己下次再做好啲。」

人要不断努力，才能成就自己，经过一次再一次的磨练，从挫败中成长，直至接到演梅艳芳原型一角，令她对演戏慢慢有信心，「我觉得喺造型上帮助咗我好多，开始掌握到个角色，亦令观众觉得我做得入型入格。」

不过同时因为太入戏的关系，她沉醉在角色中走不出来，以致情绪一度出问题，「我当时一个人住喺酒店，成日匿埋喺房困住自己，𠮶时仲用紧传呼机收通告，除咗通告以外所有嘢都唔做唔理，甚至食嘢都唔想出街食，只系喺便利店买一堆干粮当饭食。」

陈炜直言首次感受入戏的感觉，当刻感到孤独无助，惟她回想那时某程度上是自己不愿走出这个疑幻似真的世界，「前面拍咗咁大段戏咁辛苦，大家都好钟意同满意，同埋𠮶时剧组请咗个摄影师影咗好多剧照，好多相都好靓，更加唔想出嚟。」

演技渐趋成熟，实力慢慢备受认同，但在2008年她结婚后宣布息影，甘愿为前夫牺牲自己的事业，足见工作搏到尽，爱情同样爱得轰轰烈烈。回望当时放弃自己的事业，跟前夫移居台湾，她坦言感后悔，全因找不到自己的人生价值。

「𠮶时觉得嫁咗去梗系要陪伴另一半身边，其实我唔觉得自己有任何唔适应，但慢慢觉得自己变得颓废，冇乜人生价值，喺呢个社会冇乜贡献，做咩都冇人关心，令我觉得要揾番自己。」

她忆述。 爱情至上的陈炜直认至今依然是「恋爱脑」，「我从来都唔觉得自己系事业型女性，依家我对住老公嘅时候眼中都只有老公。」

2012年她与前夫离婚，在人生低谷的时期加入TVB再现幕前，惟昔日早已为女主角的她由配角做起，陈炜坦言从没有落差感，反而感激公司在低潮时扶其一把，成为她的一点光，照亮其人生。

「因为我都有几年冇拍戏，有人肯扶番起我，已经系非常大嘅恩赐，同埋𠮶时自己嘅信心都唔大，你一嚟畀个主角我可能仲惊，所以慢慢咁样试下一套，观众接受，再一套观众又受落，监制亦继续肯畀机会，我觉得都好顺利。」

相隔数年没有拍戏，她坦言曾有担忧不知观众怎看自己，直认怕「亚视味」重，又深知自己的缺点。「我喺讲对白方面系需要落多啲功夫，所以我一路都改进紧，好多谢观众同监制一路畀机会。」

陈炜多年来让人感觉不争不取，一直随遇而安，她自言性格被动，从不懂得争取，更笑言「加人工都冇争取过」，际遇相当顺利，「无论系前友台定系依家公司，都不断有好多唔同嘅尝试同机会，不过当然主动去揾一啲机会，人生都可能会唔一样，但我觉得好似依家咁样都几舒服。」

除了淡泊名利外，她出名情商高甚少看到其发火一面，不过原来陈炜曾在片场大发雷霆发火闹人，至今仍令其印象深刻。

「拍《宫心计2深宫计》嘅时候，当时喺古装街整咗个水池，讲我哋啲妃嫔宫女都会浸喺个水池度倾偈。𠮶时冬天好冻，我记得我𠮶场又落咗阵雨更加冻。因为之前要拍啲宫女喺𠮶度玩，但因为我𠮶个系一个公主嘅池，啲陈设要转，加上啲池水冻咗，要摆啲发热棒助热啲水，所以都等咗啲时间。」她忆述。

等了近两小时后，终于拍她的下水戏，岂料幕后工作人员还在弄后面的陈设，令其一等再等，「其实𠮶场我只系简单讲几句对白做下反应，但我浸喺水度都有20分钟，已经浸到震晒，我嘅耐性真系去到极限，令我好嬲忍唔住发火骂人。」

现时陈炜重提此经历时感抱歉，提醒自己时刻应保持冷静。「𠮶一刻觉得自己嘅EQ点解咁差，事后我都有同对方道歉。」

今次在《正义女神》中，她演资深大律师高淑桦有大量的台词需要熟读，更要反复练习才能讲得顺畅和有说服力，感觉出来先会有气势，因此她指必需熟读剧本才能发挥更好，绝不容易。

然而陈炜指花很多时间在处理对白上，并自揭有读写障碍，因此较其他人花更多时间看剧本。「读书嘅时候已经发现有呢个问题，考试答问题，我做极都做唔晒，够晒钟我仲喺度逐只字睇紧，所以依家入咗行都系咁，一定要聚精会神慢慢睇，睇完之后过滤再理解，所以我系好慢。」

而且，今次乃是她与佘诗曼首次合作，二人对戏火花四溅，获观众拍案叫绝。陈炜直言很喜欢二人在最后庭上唇枪舌剑的场口，并指这种互斗较宫廷戏更激烈，令人抖不过气，「我觉得最尾系成套戏嘅最高潮，因为案件关乎自己个仔，所以喺庭上面𠮶种对战嘅状态系好紧张激烈，非常好睇。」

星霜荏苒，入行转眼过了三十载，走到今天，陈炜感到十分满足，未觉有遗憾任何缺失的地方，只望一直拍下去，当一世的演员。

「除咗演戏我咩都唔识做，同埋我个人本身好平静，冇咩特别嘢可以激怒到我，所以我好依靠角色上面畀到我嘅情绪，同埋可以透过角色感受唔同嘅人生，我觉得系精彩好玩。」

因此即使日后要演婆婆、嫲嫲的角色，她绝无顾虑，并指最大的关口已经过去，「反而系我十年前开始担心要做阿妈嘅角色，个仔又10几岁，但其实自己唔介意，因为事实上我真系生得出佢哋，我觉得冇咩问题，只系初时会惊演绎上演得唔好。」

年龄总是女演员的大敌，这方面较男演员吃亏，陈炜一样怕老，惟其深明最重要保持身心状态，坦然面对岁月流逝。「我惊咗好耐，好似每一个关卡，20惊30、30惊40到40又惊50，去到依家我50几又好似冇咩太大分别。只要你仲喺呢个社会上有工作有贡献，个人就唔会脱节，加上自己最近钟意玩普拉提，我几满意依家嘅状态。」

眼前的陈炜努力活好每一刻的当下，拥抱真实的每一秒，享受做自己热爱的事，她愿意用美好的时光呈现更多好角色，绽放耀眼的光芒。

服装：MARELLA