佘詩曼貼心包辦契仔6歲生日行程！Jaco生日願望冧爆阿佘

佘詩曼（阿佘）向來出了名非常疼錫一班契仔契女。日前，陳山聰的囝囝 Jaco 迎來 6 歲生日，阿佘化身「最強契媽」，推掉大人派對並言出必行地為契仔 Jaco 獨家安排了一整天極具心思的慶生行程，簡直將他錫到燶！

阿佘在社交平台上分享了一段與 Jaco 慶生的甜蜜短片。她透露，這還是自己第一次陪 Jaco 過正日生日。本來 Jaco 在下午設有生日 Party，但因為阿佘需要工作而無法出席。沒想到年紀輕輕的 Jaco 非常醒目，坐在爸爸車上時竟要求 FaceTime 阿佘，甚至搞笑地要求與工人姐姐先落車，以便單獨跟契媽講「密偈」，主動提議：「咁我哋夜晚食飯啦！」要求兩個人共進晚餐，令阿佘大呼搞笑。

為了滿足契仔的願望，阿佘在下午五點收工後，便立刻去買蛋糕、蠟燭和生日卡。由於 Jaco 開到聲希望契媽親自揸車接載，阿佘買齊東西後便火速返屋企揸車去接壽星仔。

一上車，調皮的阿佘便決定整蠱契仔，故意送了一隻毛毛兔仔給講明想要Doctor Strange的 Jaco。阿佘笑言本想看他勁失望的樣子，怎知 Jaco 掩飾得極好，還開開心心地與爸爸陳山聰說再見，隨後兩人便直奔冒險樂園展開瘋狂玩樂之旅。

兩人在樂園內玩得不亦樂乎，「我陪佢入去玩雪，跟住又射槍、又波波池、又碰碰車…玩到人哋閂門都唔捨得走，搞到夜晚九點都未食飯！然後佢話要食麥當勞（心諗：唔係玩嘢係嘛，我收工化晒妝點搞呢？)不過冇計啦，正所謂生日大晒，所以我哋最後就去咗食🍔🍟～」

當阿佘問及生日願望時，Jaco 更甜爆甜回一句「想契媽日日陪我食飯」，當場冧爆阿佘。

吃飽後還發生了一段小插曲。阿佘原本看中麥當勞一幅以「漢堡神偷」為背景的牆壁，想在那裡切蛋糕拍照，可惜該位置已被其他顧客坐了。貼心的 Jaco 隨即提議換個地方，於是阿佘便開車載他到屋企附近的公園，進行了一場簡單而隆重的街頭切餅儀式。

當 Jaco 以為行程接近尾聲、差不多要返屋企之際，阿佘使出終極「大招」，叫他去打開座駕的車頭冚。原來，阿佘早已將 Jaco 期待已久的真正生日禮物Doctor Strange秘藏在內。Jaco 驚見心頭好後隨即興奮若狂，更馬上向契媽送上甜蜜香吻答謝。

阿佘感性表示，與 Jaco 之間的點滴趣事多不勝數，直言對方非常可愛，希望契仔長大後會記得 6 歲生日那年，有她這位契媽全心全意地陪伴度過。帖文引來大批圈中好友及網民畀Like，其中林盛斌（Bob）更搞笑留言抽水：「我過多兩個幾月就生日，唔使玩遊戲，唔使食麥當勞，唔使送禮物俾我，淨係要最尾錫嗰下得㗎啦」，笑翻全場。