中年好聲音4｜小肥神級和音助攻許美琪 蔡宓婕被連詩雅甜美氣場同化

《中年好聲音4》26日於翡翠台播出「累積排名分」第二回合「原唱之夜」。十強選手分別與十位前輩歌手結盟，以合唱形式重新演繹前輩的經典金曲。

許美琪今集夥拍小肥合唱經典金曲《寵物》，兩人在台上默契十足。小肥更搞笑透露雙方互動時交換了名字：「佢畀咗好多Energy我，大家互動到，我哋交換咗名，我係小琪，佢係美肥。」演出中，小肥展現了神級的和音實力，成功激發出許美琪的歌唱潛能，最終拿下89分。

嘉賓評審鍾鎮濤對此大加讚賞，直指和音功不可沒：「美琪真係要多謝小肥，佢啲和音好幫到你成隻歌build up，唱到尾都好穩。」而評審周國豐雖然肯定兩人的能量碰撞，但亦一針見血地點出失分原因：「小肥嘅能量，激出咗美琪個能量，原本畀90分，扣咗一分，你有一句歌詞甩得好緊要。」

另一邊廂，素有「小老虎」之稱的蔡宓婕，則迎來甜美前輩連詩雅合唱《只要和你在一起》。受到連詩雅的甜美氣場感染，蔡宓婕笑言：「同佢一齊，成個人都溫柔咗，一把聲都唔同咗。」

《只要和你在一起》歌詞極度密集，對於廣東話不太流利的蔡宓婕而言是一大挑戰。幸得連詩雅在旁不斷「做口型」暗中提水，助她順利過關，同樣奪得89分。

評審海兒對蔡宓婕的蛻變感到驚喜：「呢首歌超級難唱，好多轉聲位，啲歌詞好密，聽到一把以前冇聽過嘅聲音，溫柔咗同女人味咗，可以繼續嘗試呢啲歌。」肥媽亦大讚她成功「老虎變貓」，並點名感謝連詩雅的帶領：「蔡宓婕講廣東話歪歪哋，但隻歌好多字，但冇一粒係歪喎。」