英格蘭聯賽盃第三圈：曼聯 2-3 白禮頓

英格蘭聯賽盃第三圈，曼聯主場領先白禮頓兩球下，倒輸2-3出局。

紅衫曼聯開個好頭，19歲小將列斯右路拉大位，射近柱入，8分鐘就領先。今季首次正選的他，頂著守衛，左腳抽入。只是約1分鐘後，拉舒福特左路搶到，落底起腳被擋，還有美臣蒙特補中，短時間內拉開兩球優勢。

但領先兩球的曼聯，好球時間只得頭10分鐘，餘下大部分鏡頭都是白禮頓的攻勢。保斯卡利遠射高出，之後中路配合，造就走直線的耶古爾成功突破，不過他射斜。

曼聯防線已經「危危乎」，完半場前左閘夏占放長傳，希雲追不及，門將達路不出迎，讓高斯杜拉斯射入，為白禮頓補時1分鐘追成1-2。這下長傳彈地兩次，高斯杜拉斯有足夠時間接應。換邊後前場逼搶奏效，達洛治解圍到中路，胡斯高域頂贏施斯高，柏斯高哥斯一扣一射，65分鐘追平2-2。

曼聯在令人失望方面，很少令人失望，上場曼市打吡踢多一人輸波，今場領先兩球，到69分鐘被反超。希雲被「通坑渠」，高斯杜拉斯壓落底傳中省中人，落在迪古柏腳下，為白禮頓射成3-2。主帥卡域克與前幾任「咪一樣」的畫面又出現？

曼聯失球又失勢，落後之下更一度被壓著來攻，最有威脅是拉舒福特這次「走甩」，不過半單刀機會，把握不到，射近柱，史迪爾用腳封著。尾段白禮頓有機會拉開，不過被約羅頭槌頂走，門將達路亦擋走近射。

曼聯維持輸2-3，是50年來首次在主場，領先兩球下倒輸。上季足總盃輸給白禮頓出局，今季就在聯賽盃有同一遭遇。白禮頓連續三屆打入第四圈，將會對曼城或諾域治。