何依婷遭網民質疑買到「假波衫」 本尊高EQ親自留言回應

何依婷（Regina）日前在社交網分享了一張身穿英超球隊曼城主場波衫的自拍靚相，原本只是與粉絲分享休閒日常，怎料卻意外惹來一場「假波衫」疑雲。

有一名網民將焦點放在波衫的印字上，並留言質疑 Regina 身穿的是假波衫，甚至推測其朋友可能受騙：「何依婷小姐，你個朋友係咪跣你呀！？曼城主場波衫，就咁睇係真，但啲印字好有問題！英超正版字唔係咁樣架喎！你個friend可能瀨嘢喎！😅😅😅😅😅」

面對網民的質疑，何依婷親自現身留言區大方回覆，為送波衫的朋友平反：「朋友幫我買+印字架！掃了QR code～應該唔會係假掛？🥹」Regina 語氣溫和，更附上一個無辜的表情符號，成功化解了一場尷尬。

該名最初提出質疑的網民亦隨即「轉軚」，相當有禮貌地接受了 Regina 的解釋：「Regina，謝謝你的回應。既然係official有認證，咁就係真嘢！希望你著得開心啦！本尊已回應。討論完畢。」