夫妻的博奕｜郭柏妍盡顯港女本色逼人吐鮑魚！林漪娸爆笑揭秘：即場加戲冇Plan過

《夫妻的博弈》笑料百出！日前（19日）播出一集，雪文（郭柏妍飾）踩上張頴康屋企大放笑彈，三人組合火花十足，獲大批觀眾留言激讚超搞笑。

劇情講述雪文繼續主動出擊，登堂入室討好未來奶奶佩貞（林漪娸飾）兼宣示主權。為了塑造自己「入得廚房，出得廳堂」的完美新抱形象，雪文不但買盡山珍海味，更親自下廚大獻殷勤！

雪文卻盡顯「港女」本色，堅持要「相機食先」瘋狂打卡！最搞笑一幕，莫過於施繼威 Mark（張頴康飾）和佩貞剛把鮑魚放入口，雪文竟突然大叫：「我未影呀隻鮑魚！」嚇到兩母子硬生生將口中鮑魚吐出來讓她影相。當二人以為終於有得食，雪文又得寸進尺：「不如我哋影張自拍先！」搞到兩母子勉強擠出笑容，極度厭煩又無奈，場面惹笑！

林漪娸接受 tvb.com 獨家訪問時，大爆這場超搞笑的「吐鮑魚」戲碼，原來是她與張頴康的神來之筆！她笑言：「我同康仔好熟，好有默契，我哋經常都會擺好多嘢落場戲度。好似呢場吐鮑魚，我哋事前係冇 Plan 過，好自然咁大家做出嚟！」

漪娸姐認為演員不應被劇本「框住」：「我哋做咗咁多年戲，知道嗰場戲講咩，之後再睇現場對手畀啲咩而接。大家接嚟接去，所以我同康仔成日都係咁，成個戲先會變得生活化啲。」足見兩位好戲之人的功力！

除了與張頴康默契十足，漪娸姐對今次合作的新晉小花郭柏妍亦讚不絕口！她大讚對方態度極佳：「佢好乖、好聰明，有時你話啲嘢畀佢知，佢好快吸收到再改。同埋嗰時拍攝時間好長，佢好多戲，每日得幾個鐘瞓覺，但依然好準時，做好晒功課，所以我都好錫佢！」