夫妻的博弈｜郭柏妍仙氣婚紗Look曝光 硬撼麻煩奶奶林漪娸 婆媳過招爆世紀金句

《夫妻的博弈》昨晚（24日）播出一集，施繼威 Mark（張頴康飾）終於向雪文 Sherman（郭柏妍飾）求婚。正當Sherman 以為終於一圓成家立室的美夢時，卻遇上人生最大考驗「麻煩奶奶」佩貞（林漪娸飾）！一場充滿火藥味又極具喜感的「婆媳大鬥法」正式上演，瞬間引爆網民強烈共鳴！

劇情講到 Sherman 去試婚紗時，特意挑選了一件露肩兼裙尾開衩設計的性感款式，完美展現其優越的身材比例，索到爆燈！點知奶奶佩貞見到當場黑面，毫不留情狠批新抱衣著過於暴露：「嘩！做乜擠晒出嚟㗎！你做人老婆喇，收返埋佢喇！」令現場氣氛瞬間跌至冰點。

不單止揀婚紗無得話事，連結婚請帖與酒席地點都全被奶奶一手掌控！佩貞堅持要在屋邨酒樓舉辦婚宴，聲稱「龍鳳大禮堂夠喜慶」，實質只是貪便宜可以豁免酒水，將「控制狂」本色發揮得淋漓盡致。

一心打算在六星級酒店辦夢幻婚宴的Sherman，眼見「媽寶」男友 Mark 在旁零話事權兼完全無幫口，唯有主動出擊，終極大反擊：「咁依家係你嫁定係我嫁啊？」佩貞亦唔係省油的燈，霸氣回敬：「咁係你嫁入嚟我哋門喇！你將來姓施，個仔又係姓施，係唔係？」

這集「婆媳大戰」播出後，火速成為網民熱話！大批觀眾大讚郭柏妍與林漪娸火花十足，喜感爆棚。由於情節太過寫實，直指「婆媳關係」永遠是一門高深學問，網民紛紛入晒戲湧入留言區大吐苦水：「有咁嘅奶奶，你敢嫁嗎？」、「嫁入呢種屋企，仇人都釋懷了！」、「太真實喇，我結婚時我奶奶都係咁！」