胡楓精靈現身飯局 林建明爆兩人瘋狂鬥嘴：希望日後能夠有多多日子繼續與他互窒

現年94歲的「修哥」胡楓，早前因急性膽管炎引發膽石堵塞而緊急入院，更一度昏迷長達4日，情況令人相當擔憂！幸好修哥吉人天相，最終平安無事，順利度過難關。

經過一輪休養生息後，修哥近日終於出山，現身與一班圈中老友記聚會。從相片可見，修哥與「大姐明」林建明、李琳琳等好友開心飯聚。大病初癒的修哥精神奕奕，笑容滿面兼氣色超好，復原速度極快，絕對令一眾擔心他的粉絲同網民「放心晒」！

向來老友鬼鬼的林建明亦在社交網開心分享聚會點滴，她大爆修哥病癒後依然非常精靈，腦筋轉數極快，兩人在飯局上更不斷瘋狂互窒！大姐明感性又幽默地留言表示：「希望日後能夠有多多，長長，日子繼續與他互窒，鬥嘴！」

林建明與修哥的對話如下：

( 我一見修哥即說 ）

明：胡楓，請你俾個樣我睇吓

（ 他乖乖的將塊面向住我 ) ( 我一看 ）

明：哇…白淨咗喎，仲靚仔過以前！

胡：使乜講 !

明：咦…你口罩顏色好特別，原來襯返件衫！係咪玩Fashion先？

胡：唏，呢啲小兒科啦 ！

( 每道餸菜都很美味，接近尾聲時來一道節瓜，修哥眼甘甘望住，但他已經飽了，因病後不能吃太多，一飽即止。於是陳太就有個提議 ）

陳：俾少少佢試吓啦

明：係囉，俾鼻屎咁多佢試吓好嗱！

胡：鼻屎都有分大嚿同細舊㗎喎！

明：（ 無語，接唔上添 ） ( 明 唯有轉話題 ）

明：胡楓你真係叻仔，精靈活潑，反應敏捷！

胡 ：我幾廿年嚟都係咁㗎啦，乜你而家先知咩？

明：（ 俾佢吹脹 )