死有對証｜韋家雄化身毒舌法醫 讚陳曉華：呢個女仔得！

《死有對証》於7日正式首播！劇中飾演資深法醫「林琛」的韋家雄，不僅對新人法醫陳曉華（Hera）瘋狂展現「毒舌」本色，更與重案組展開火花四濺的精彩角力，甫開播已充滿看點。

對法醫專業抱有極高執著的林琛，在面對重案組高級督察高淑嫻（王綺琴飾）催促報告及質疑辦事效率時，依然氣定神閒地反駁：「揾得我單單case都係關乎人命喇，如果唔係揾我做乜呢？」當對方施壓要求盡快確認死者身分時，他更霸氣發功狂爆金句：「你係咪有面盲症呢！我係法醫，我唔係摸骨算命！摸下就知道生辰八字，幾時生幾時死！」令觀眾拍案叫絕。

林琛的毒舌威力同樣應用在新人女法醫程芷昕（陳曉華飾）身上。當芷昕苦苦哀求進入解剖室觀摩學習時，他毫不留情地炮轟：「學嘢你就返學喇！我唔想我解剖嘅時間，有件無關事嘅嘢戙喺度阻住我！」雖然嘴上句句不留情面，但他最終仍在芷昕的軟磨硬泡下改口答應，展現出「口硬心軟」的一面。

雖然在劇中對陳曉華百般刁難，但韋家雄在接受獨家訪問時，卻對這位對手戲最多的拍檔給予極高評價。他自揭對Hera的第一印象是「令人眼前一亮」，並坦言：「第一日開工第一場戲，呢個對手都勁喎！你睇到佢嘅努力同進步，拍咗呢套戲之後，覺得呢個女仔得！」面對劇中充斥著複雜又專業的法醫術語，韋家雄更大讚Hera能夠好好消化台詞，而非盲目死背，直言這種帶有自身理解的演繹「已經係好難得」。