港人獲派石圍角邨低層單位 憂冷氣散熱發文求助 網民指錯重點揭2大致命傷

近日有港人在公屋討論區上載配房通知書及照片發文求助，指自己獲分配荃灣石圍角邨石荷樓2樓單位。從照片可見，該單位位於平台上方，1樓及地下為區服務機構，下方安裝了多部冷氣散熱機及通風排氣管道。事主因而發文求教：「大家點睇，地下的冷氣機熱氣影響大嗎？接受 or 拒絕，求意見，感謝。」

帖文一出迅速引發網民熱議，大批網民隨即指出事主「錯哂重點」，直言「冷氣機散熱，唔大問題」、「有隔咗石屎牆擋住」，反而提醒他注意以下兩大致命隱患。

簷篷高空擲物衛生惡劣：單位窗戶位置正對平台簷篷，經常有人高空丟垃圾。網民坦言：「清潔工唔會日日清，一個月先清一次，你都要忍受成個月」，更有曾住低層的網民極力勸退，形容「日日有新鮮姨媽巾鼻涕液體廁紙」。

沙井堵塞引致屎水倒灌：有熟渠務的網民指出舊樓存在深層結構問題，2 樓向來是「爆屎渠」黑點。即使設有獨立去水喉，但「大家都係用同一個沙井，沙井塞 2 樓就立刻爆屎」，一旦堵塞屎水隨時倒灌入屋。

面對網民圍攻勸退，事主亦道出心中無奈。他坦言全家現時正住在過渡性房屋，直言「住過渡房屋住到人就來抑鬱」，極度渴望能盡快上樓過穩定生活。事主補充指，石圍角邨雖然樓齡已逾 40 年，但鄰近港鐵站，地理位置極佳，加上鄰近學校及商場，生活配套非常成熟，因此對是否拒絕該單位感到十分糾結。