林智樂新歌首度嘗試輕快浪漫曲風 MV攜師妹甄敏芳演校園情侶

林智樂（Felix）近日推出新歌《魔法情侶工作室》，是他首次嘗試輕快浪漫的曲風。MV特別邀請到《聲秀》師妹 Jenny 甄敏芳擔任女主角，二人飾演一對校園情侶。Felix 更形容今次是「可一不可再」，笑言：「我演藝生涯可能係得一次會有咁 close 嘅鏡頭。」

被問到拍攝親密鏡頭時有沒有心跳加速，Felix 笑言：「其實時時刻刻都有心跳嘅，如果冇心跳就會死㗎嘛。不過真係冇諗咁多，終於明其他人拍 kiss 戲、close 戲嘅感受，因為現場有好多人喺現場，淨係諗住要盡早完成，冇諗咁多嘢。」

Felix 又表示拍之前有好好溝通：「有問清楚對方 o 唔 ok，如果唔 ok 可以改。佢覺得唔舒服或者你邊邊面靚都可以改，最緊要係令對方感覺得舒服，安心就可以，咁就唔會尷尬。」他亦提到，最終 MV 剪走了一些更親密的鏡頭，因為他與團隊都覺得甜蜜可以不用「畫公仔畫出腸」，保留想像空間給大家會更好。

作為首次拍攝 MV 的師妹，Jenny 坦言接到任務時既興奮又緊張，事前除了早睡護膚外，更做足準備：「見故事大綱有親密接觸鏡頭，我好驚自己會忍唔住笑，又或者會怯場退縮。所以事前有搵屋企人陪我練習，預先體驗同另一個人保持極近距離嘅感覺，提前預習一下。」

對於首次與 Felix 合作，Jenny 大讚師兄貼心又幽默：「佢好直率又搞笑，而且察覺到我會尷尬，拍親密鏡頭前會一直安慰我『唔使擔心』，叫我放鬆啲，令我非常安心。」她笑言 Roll 機時雖然能迅速投入角色，但距離太近時確實會緊張到心跳加速兼不敢呼吸：「拍完之後先發覺成個人好熱、出晒汗面都紅埋！」不過她依然十分感激能夠獲得這次寶貴的演戲體驗。