屯門公路深夜驚現「逆線狂奔」 乘客驚呼：做咩呀黐線㗎！

屯門公路發生一宗危險駕駛事件。今日（26日）凌晨零時34分，網上瘋傳一段車Cam片段，車Cam主當時正沿屯門公路快線往荃灣方向行駛，當駛至近深井路段時，竟發現有一輛私家車在快線上逆線迎面高速疾馳而至。

車Cam主即時收慢車速，前方車輛亦緊急扭軚避開，涉事逆線私家車最終在兩車夾縫中快速而過，片中隨即傳出一名女子驚慌呼喊：「做咩呀？黐線㗎佢！」

事後車Cam主將影片上載至網上並發文尋求協助，坦言被嚇倒：「痴線㗎！嚇到我而家仲驚緊頭先嗰下，有無gp友剛才有遇到呢架車嗎？我地條片好似影唔到佢車牌...」希望當時剛好途經現場的網民能夠提供相關片段或涉事車牌，將違規司機繩之於法。