葉蒨文曾展望慶祝拍拖一周年 變裝低調撐GM出騷勁冧豬

葉蒨文（Sophie）與曾展望（GM）憑藉節目《女神配對計劃》人氣急升！兩人自節目中成功配對後感情一直非常穩定，「GS」CP 深受網民喜愛與支持！

不經不覺，兩人迎來拍拖一周年紀念！葉蒨文日前在社交平台晒出一輯與 GM 甜蜜撐枱腳的靚相放閃！相中的 Sophie 身穿黑色吊帶晚裝，在「男友視角」下對鏡嘟嘴賣萌，眼神盡是甜蜜。餐盤上更寫有「Happy Anniversary」字樣，現場粉紅泡泡滿瀉！

帖文一出，大批網民紛紛送上祝福：「開心開心，咁就一年嘞，永遠幸福快樂」、「我嘅女神繼續幸幸福福」，好姊妹李芷晴亦留言：「Happy GS Day！」。

其實，兩人私下的甜爆互動遠不止於此！日前 GM 出席《試真D唷》活動時，Sophie 便特意變裝化身小粉絲到現場力撐男友。事後 Sophie 分享這段「追星」體驗：「小鹿亂撞好緊張，等個星出黎嚟感覺！」

當被問及看到現場大批粉絲支持 GM 有何感想時，Sophie 更揮動手中的應援物，甜絲絲地表示：「好開心同埋好自豪！」，吸引網民狂讚：「好稱職嘅迷妹啊」、「連美儀姐都差啲認唔到你」！